Zer ari da gertatzen?
Oporretan hotelak eta apartamentuak erreserbatzeko ohikoa da Booking.com erabiltzea. Horretaz jabetu dira iruzurgileak, eta orain teknika berri bat baliatzen dute jendea engainatzeko: web helbide faltsuak sortzen dituzte, oso antzekoak diruditenak, baina ez direnak benetakoak.
Nola egiten dute tranpa?
Iruzurgileek japonierako hizki bat (“ん”) erabiltzen dute. Letra horrek, begiz, ia barra arrunta ("/") edo “n” baten antza du. Horrela, helbidea begiratzean, ia ez da bereizten.
Adibidez:
- Benetakoa: https://admin.booking.com/hotel/...
- Faltsua: https://admin.booking.comんdetailんrestric-access.www-account-booking.com/hotel/...
Bigarrena faltsua da, nahiz eta oso antzekoa dirudien. Beltzez dituzue benetan domeinuak zein diren nahiz eta bisualki bigarrenean admin.booking.com dirudien.
Zer gertatzen da klik egiten badut?
Esteka faltsu horietan klik eginez gero:
- Zure ordenagailura edo mugikorrera fitxategi arriskutsu bat jaitsi daiteke.
- Fitxategi hori instalatuta, iruzurgileek zure datuak (pasahitzak, txartelak, kontuak…) lapurtu ditzakete.
- Batzuetan, ordenagailua urrutitik kontrolatzeko gaitasuna ere izan dezakete.
Nola babestu zure burua?
Hona hemen lau aholku erraz:
- Begiratu ondo helbidea: Booking-en helbide zuzena booking.com da, besterik ez. Barra baten edo bestelako hizkirik ikusiz gero, susmagarria izan daiteke.
- Ez egin klik mezu arraroetan: Presaka edo urgentziaz iristen diren mezuak (ordaintzeko azken aukera dela, kontua blokeatuko dela…) normalean tranpak dira.
- Sartu zuzenean webgunera: Ez klikatu esteka batean; hobeto da nabigatzailean www.booking.com idaztea.
- Zalantzarik baduzu, galdetu: Hotelarekin edo plataformarekin zuzenean harremanetan jarri eta baieztatu informazioa.
Ondorioa
Iruzurgileek tipografia eta hizki bereziak erabiltzen dituzte webgune faltsuak benetakoak diruditen moduan erakusteko. Baina arreta pixka batekin erraz ikus daiteke engainua. Gogoratu: zure datuak babesteko, beti sartu zuzenean webgune ofizialean.
Lotura interasgarriak:
